O NÁUTICO CAE ANTE O INTASA SAN SADURNIÑO NO DERBI GALEGO DA SM-2:

NÁUTICO BOIRO VOLEIBOL 0-3 INTASA SAN SADURNIÑO
(24-26, 19-25, 16-25)-(Superliga 2 Masculina)

Os atacantes de banda do Intasa desequilibran o derbi

Dolorosa derrota a sufrida polo noso primeiro equipo masculino neste derbi galego da categoría de prata do volei español. Tras unha semana de moitas dúbidas ó redor do Náutico debido á mala imaxe ofrecida ante o CV Mediterráneo os ferrolanos que dirixe Flavio Calafell marchan de xeito merecido con 3 puntos da Cachada. O encontro comezaba cos nosos moi atinados no side-out. Deste xeito se chegou sempre en vantaxe ós tempos técnicos do primeiro set (8-5 e 16-11). Miguel Vázquez e Narciso Abalo mantiñan a raia á defensa visitante coa súa efectividade ofensiva. Os de ferrolterra estaban acorralados e pasando moitísimos apuros na súa construcción ata que as pantasmas de fai 7 días volveron para castigar duramente ó Náutico. O pulso tremeulle ós atacantes branquiazuis nos momentos quentes do set e o Intasa aproveitou a súa oportunidade de entrar no encontro dan man dos seus atacantes de ala. A derrota parcial caeu como unha xerra de auga fría e dinamitou por completo a confianza dos nosos. Os 17 puntos do receptor venezolano Hernán Tovar (44% de efectividade en ataque) e os 15 do seu compañeiro de posición, o murciano Francisco Fernández, foron as armas coas que os de San Sadurniño feriron de morte ós de Emilio Palacio. No 2º e 3º set non houbo historia: un crecido Intasa levábase pola vía rápida un triunfo ante un equipo que lamentablemente non estivo de novo á altura da súa extraordinaria afección, sen ningunha dúbida a mellor. Consulta tódolos datos do encontro premendo neste enlace. Polo Náutico xogaron: Iván S., Narciso A., Cristóbal Á., Miguel V., Jesús V., Mario I. e Adrián A. (líbero). Como reservas estaban o colocador xuvenil Ismael M., Emilio P., Gabriel del C., Manuel P. e Germán R.

REDESYL BOIRO VOLEIBOL 0-3 ASESORES VILA CASTRO

(24-26, 18-25, 21-25)-(2ª Div. Autonómica Masculina)

Clara derrota do Redesyl na súa estrea ligueira

Mal encontro o disputado polo noso equipo filial masculino ante os ourensáns do Asesores Vila Castro na mañá do sábado. O cansanzo tanto físico como mental dos nosos xogadores en idade xuvenil tralo durísimo tie-break disputado minutos antes e a derrota no primeiro set despois dun 23-21 a favor foron as claves da vitoria visitante. Os de Adrián Alves non souberon sobrepoñerse ó duro golpe sufrido no final do primeiro set e viron como os da cidade das burgas marchaban cos 3 puntos en xogo sen apenas oposición na pista 1 da Cachada. A vindeira semana tócalles xornada de descanso polo que se poderá preparar a conciencia a visita dos pontevedreses do Gómez Lor Multiópticas do vindeiro 22 de novembro. Consulta tódolos resultados da xornada aquí. Polo Redesyl xogaron: Daniel V., Xian P., Lois V., Marcos A., Félix R., Fran D. e Dani G. (líbero). No banco de reservas estaban Ismael M., Pablo R., Juan O., Diego R. e Óscar R.

JEALSA BOIRO VOLEIBOL 0-3 CALDARIA VOLEYOURENSE
(14-25, 9-25, 22-25)-(2ª Div. Autonómica Masculina)

O JEALSA choca contra o bloqueo-defensa do Caldaria

Derrota en tres sets do primeiro equipo feminino ante un dos principais candidatos ó título da 2ª División. O inicio do choque estivo marcado polo 0-6 de inicio conseguido polas ourensás. A orde defensiva e os ataques da súa oposta poñían unha renda insalvable para as de Mario Iglesias. O 2º arrancaba igual. 0-5 de inicio para un Caldaria ordeadísimo en bloqueo-defensa que por momentos chegou a desesperar ás atacantes boirenses. Na 3ª manga o ritmo das visitantes era inalcanzable para o JEALSA que tivo que tirar de orgullo e casta para levar a igualdade ó tramo decisivo do xogo. Tras superar parciais como un 3-11 ou un 13-21 as nosas maquillaron o luminoso e chegaron a poñerse 20-22 pero xa era tarde. Polas boirenses xogaron Laura M., Mariana D., Melissa N., Rebeca G., Xiana R., Alejandra R. e Sheila O. (líbero). Tamén xogaron Sara B., Cris F., Alejandra M., Noelia D. e María T.

JEALSA BOIRO VOLEIBOL 3-2 ASESORES VILA CASTRO

(21-25, 25-21, 25-15, 20-25, 15-12)-(Liga Galega Xuvenil Masculina)

Os centrais catapultan ó JEALSA na Liga Galega

Importantísimo triunfo dos xuvenís para seguir invictos na Liga Galega nun encontro marcado pola tensión e os altibaixos de ambos equipos. O choque comezaba co JEALSA atenazado. Os de Adrián Alves non conseguían atopar fluidez no seu xogo e os 3-4 puntos de vantaxe que tomaban os visitantes no tramo inicial do encontro non facían máis que acrecentar o problema. A medida que pasaron os minutos o xogo mellorou e o empate fíxose inevitable. Os boirenses ían lanzados e coa aportación dos seus centrais anotábanse o 3º set. Neste momento os nosos baixaron a garda levando o choque ó desempate gracias á actuación do receptor ex da concentración permanente Victor Conde. O set decisivo mantívose equilibrado ata que un bloqueo directo de Fran Dieste conseguía o break-point que catapultaba ós nosos. JEALSA: Ismael M., Xian P., Lois V., Marcos A., Félix R., Fran D. e Dani G. (líbero). Tamén xogaron: Rubén M., Daniel O. Pablo N., Borja V e Adrián G.

JEALSA BOIRO VOLEIBOL 0-3 VOLEYOURENSE
(20-25, 10-25, 17-25)-(Liga Galega Xuvenil Feminina)

8 xogadoras cadetes formaron co JEALSA xuvenil

A cuarta vitoria das xuvenís en Liga Galega deberá esperar. Dábase o pistoletazo de saída cunha igualdade que tan só o maior acerto das visitantes en saque podería quebrar. Melissa Novoa tentaba de manter a flote o navío boirense pero a renda conseguida polo Voleyourense desde os 9 metros foi demasiado. Coa mesma arma dominaban as da cidade das burgas o arranque do 2º parcial onde as boirenses chegaron a estar 7 puntos por debaixo no tanteador (3-11) que se transformarían en 15 ó final do set (10-25). No 3º as nosas melloraron. Sara Bugallo atopaba agora unha maior efectividade das súas atacantes pero co 16-16 os erros condeaban ó JEALSA e os 2 puntos poñían rumbo Ourense. Polas boirenses xogaron: Sara B., Paula V., Melissa N., Alejandra M., Lía V., Alejandra G. e Sheila O. (líbero). Como suplentes estaban as cadetes Ada V., Sara T., Laura O., Marta S. e Irea T.

JEALSA BOIRO VOLEIBOL 3-0 ASESORES VILA CASTRO

(Agardando parciais)-(Liga Galega Cadete Masculina)

Os nosos cadetes seguen sen coñecer a derrota

Vitoria en tres sets para o JEALSA cadete masculino nun encontro controlado de principio a fin que significa para os de Adrián Alves o 4 de 4 en Liga Galega. O xove equipo visitante pouco podía facer ante o bombardeo que estaban a padecer dende a liña dos 9 metros. Ben plantados en defensa e moi atinados en contraataque baixo a dirección do pequeno dos irmáns Martínez camiñaban decididos os branquiazuis hacia unha nova vitoria na competición doméstica. Cabe destacar unha semana máis a aportación ofensiva do receptor Pablo Nieto e do oposto Daniel Olveira, convertíndose sen ningunha dúbida nos xogadores máis destacados dos nosos en facetas ofensivas. Para coñecer os outros resultados da LGCM preme aquí. A formación do JEALSA estaba composta por: Rubén M., Daniel O., Pablo N., Álex V., Christopher R., Gabriel S. e Darío O. (líbero). Como reservas estaban Sergio C., Manu T., Pablo D., Álvaro P. e Borja S.

JEALSA BOIRO VOLEIBOL 3-1 VOLEYOURENSE
(25-11, 25-11, 19-25, 25-17)-(Liga Galega Cadete Feminina)

Alejandra, destacada ante Voleyourense

Nova vitoria para as de Emilio Palacio nun encontro que as afianza nos postos altos da LGCF xunto con EMEVÉ, CV Ribeira Sacra e Liceo. O acerto inicial das nosas en defensa ocasionaba múltiples situacións de contraataque colocando un contundente 6-0 nos primeiros compases do choque. Mesmo guión no transcurso do 2º set onde puntuais á cita co cambio colocaban o 2-0 no luminoso. As dúbidas chegaron no 3º parcial. O servicio do JEALSA xa non era nocivo para a liña de recepción visitante e que construía mellor o seu ataque conseguindo parciais tales como un 3-17. No 4º as nosas recuperaron o instinto competitivo e coa primeira unidade sobre  terreo de xogo pechaban un encontro que significa o seu cuarto triunfo da 14-15. Polo JEALSA saltaron á cancha: Marta S., Laura P., Alejandra M., Paula V., Laura O., Lía V. e Irea T. (líbero). Tamén participaron Laura L., Verónica P., Lucian V., Sara T. e Ada V.

JEALSA BOIRO VOLEIBOL 3-2 ASESORES VILA CASTRO

(25-17, 25-21, 15-25, 23-25, 15-12)-(Liga Galega Infantil Masculina)

Primeira vitoria para os nosos cachorros, ¡parabéns!

E chegou a primeira. A estrea no casilleiro de vitorias do equipo de nova creación infantil masculino do Boiro Voleibol fíxose esperar menos do previsto. A mellor actuación dos nosos desde a liña de saque poñía terra de por medio e situaba ós de Adrián Alves cun favorable i esperanzador 2-0. No terceiro os visitantes conntratacaban e recurtaban distancias aproveitando o desconcerto dos boirenses e o seu menor acerto en saque. O cuarto foi o set máis igualado de todos, pero as dúbidas dos nosos levaban o encontro ó desempate. Chegado este punto Daniel Vázquez e Sergio Castaño deron un paso á fronte e deixaron os dous puntos da vitoria en Boiro. Tódolos resultados da xornada na LGIM aquí. Polo JEALSA infantil masculino xogaron: Daniel V., Sergio C., Manuel L., Carlos L., Víctor M. e Esteban P. Como reservas agardando a súa oportunidade estaban Alexis S., David F., Alberto T., Abel G. e Rodrigo M.