XORNADA: O NÁUTICO ALCANZA O ANSIADO TRICAMPIONATO NO PAÍS VASCO

VOLEIBOL BERA BERA 0-3 NÁUTICO BOIRO VOLEIBOL

(13-25, 20-25, 19-25)-(1ª Div. Nacional masculina)

¡O Náutico fai historia e consegue o triplete!

Chegou o día que todos agardabamos e, finalmente, o Náutico Boiro Voleibol proclamouse no polideportivo Pío Baroja de San Sebastián campión por terceiro ano consecutivo desta 1ª División do voleibol español. Os homes dirixidos polo mítico central ex-internacional absoluto José Luis Moltó pouco puideron facer ante un Náutico que chegaba a terras vascas con moito en xogo e coa intención de voltar a Galicia co título ligueiro baixo o brazo. O encontro comezaba igualado nos seus primeiros compases. Os nosos mostrábanse lixeiramente tensionados pero de contado a presión co servicio facilitaba que o bloqueo-defensa comezase a marcar as diferencias. Iván Souto torpedeaba dende a liña dos 9 metros as opcións de vitoria locais na primeira manga. No segundo xogo o nivel xeral do partido foi inferior. Os boirenses non conseguían xogar coa intensidade que acostuman e os locais aproveitábanse para seguir a estela dos branquiazuis no luminosos nun pouco vistoso set. No desenlace do mesmo de novo o servicio barbanzano marcaba as diferencias e poñía terra de por medio nun tanteador que semellaba definitivo para ledicia dos nosos. Mario Iglesias era agora o verdugo dos vascos. No terceiro e derradeiro persistían as sensacións do parcial anterior. Ritmo lento e xogo pouco vistoso foron os ingredientes dun set que coroaba por terceira tempada consecutiva ós rapaces de Emilio Palacio e poñía o nome de Boiro no panorama do volei nacional. Polo Náutico xogaron: Iván S., Emilio P., Cristóbal A., Gustavo R., Jesús V., Mario I. e Adrián A. (líbero). Como reservas estaban Rubén T., Miguel V., Xavier S e Manuel P.

EMEVE B 3-0 REDESYL BOIRO VOLEIBOL

(25-16, 25-16, 25-9)-(2ª Div. Autonómica masculina)

O cadete Ismael M. traballou a reo na construcción

Encontro de máis a menos o realizado polo equipo filial masculino en terras lucenses. Cun equipo formado por numerosos xogadores en idade xuvenil e con importantes baixas como as de Adrián Armental, Xavier Sarille, Alén García ou Antón Pérez presentábanse os de Adrián Alves no feudo do 5º clasificado para plantar batalla e seguir coa súa formación nesta categoría sénior. Os erros en ataque e servicio dos nosos ocasionaban que os locais se viñeran arriba e que os nosos perderan paulatinamente a confianza. O oposto xuvenil Fran Dieste intentaba manter ó seu equipo dentro do encontro a base de ataques pero os problemas en recepción non lle permitían a Ismael Martínez construir dun xeito óptimo o seu xogo. Os ánimos do Redesyl fóronse apagando a medida que avanzaba o encontro e os dous puntos da vitoria quedaron en peto local mantendo no último posto da clasificación ós de Adrián Alves. Polo Redesyl xogaron: Ismael M., Fran D., Juan O., Diego R., Dani G., Óscar R. e Adrián O. (líbero).

EMEVE 3-0 REYCA BOIRO VOLEIBOL

(25-16, 25-9, 25-15)-(Liga galega infantil masculina)

O Reyca cae na casa do líder

Derrota en tres sets do equipo infantil masculino ante un conxunto cunha experiencia maior e cun servicio que presionaría, facéndoa tremer, a recepción do Reyca en todo o choque. Os erros dos nosos nos primeiros compases de cada set serían cruciais para o desenlace dos mesmos nos que os de Adrián Alves sempre tiñan que xogar a remolque e ante un rival cheo de confianza. Moitas foron as oportunidades que os nosos tiveron de puntuar tras ataques fáciles do EMEVE pero a falta de contundencia no ataque propiciaba que o rival tivera, case sempre, segundas oportunidades para anotarse os puntos. A puntilla en cada manga chegaba sempre froito de potentes saques dos lucenses. O colocador Rubén Martínez tentaba por tódolos medios reciclar o xogo dos seus pero a misión era moi complicada. Tras este tropezo o Reyca ocupa a 6ª praza da competición autonómica con 5 triunfos en 13 encontros. Polos boirenses xogaron: Rubén M., Álvaro P., Dani O., Darío O., Christopher R. e Gabriel S. Tamén xogaron Manuel T. e Álex V.

EMEVE 3-0 O SECRETO BOIRO VOLEIBOL

(25-8, 25-20, 25-15)-(Liga galega xuvenil feminina)

O Secreto non pode co potencial do EMEVE

Derrota clara do equipo xuvenil feminino ante as campioas da liga regular. Plantexábase moi difícil o partido, xa que as lucenses do EMEVE tan só cederan un set nos anteriores 20 encontros. A pesar das rotacións das súas xogadoras, a superioridade no campo, cunha moi boa defensa e un ataque demoledor, era evidente e as locais dominaban con autoridade o luminoso. As boirenses foron claramente de menos a máis e pese á contundente derrota mostraron un mellor xogo que nos anteriores encontros de liga galega. Tras esta derrota as de Emilio Palacio e Narciso Abalo fican na 7ª posición da táboa clasificatoria con 8 vitorias en 21 encontros. A vindeira semana o Calasancias Coruña visitará A Cachada, a preparar o encontro rapazas. O Secreto Boiro Voleibol formaba con Sara B., Emma O., Ana B., Isa G, Katy S., Alejandra G. e Melissa N. (líbero). Como reservas atopábanse Sheila P., Andrea D. e Antía S.

EMEVE 3-0 INGENIERÍA TRAZOS BOIRO VOLEIBOL

(25-20, 25-14, 25-17)-(Liga galega cadete feminina)

As cadetes xogarán a promoción para evitar o descenso

Mal partido das cadetes do Ingeniería Trazos Boiro Voleibol no seu desprazamento á cidade da muralla para medirse ó EMEVE. Ante un equipo que non semellaba superior na cancha, a falta de concentración e os continuos erros en saque e recepción das nosas facía imposible a cercanía no luminoso co equipo local e impedía a loita das branquiazuis nos momentos decisivos dos sets. Xa sen posibilidades de acadar a permanencia de categoría nesta fase regular do campionato, as xogadoras barbanzás terán que traballar moi duro se queren continuar un ano máis na máxima competición autonómica e loitar na promoción contra equipos que buscan o ascenso. As de Emilio Palacio marchan 11ª na clasificación a falta de recibir a vindeira semana ás coruñesas do Calasancias. Semana de preparación equipo, moito ánimo. Ingeniería Trazos Boiro Voleibol: LeaG., Emma O., Sara L., Antía S., Ana B., Irea T. e Ángela Alves (líbero). Tamén xogaron Laura O., Lía V. e Paula V.

EMEVE 3-0 NAVALES CHICOLINO BOIRO VOLEIBOL

(25-11, 25-7, 25-16)-(Liga galega infantil feminina)

O servicio do EMEVE foi demasiado para as nosas

Encontro sen historia o vivido en Casa do deporte de Lugo entre dous equipos con niveis de xogo moi diferentes. A cor do EMEVE foi a que adornou en todo momento o encontro apoiadas nun sempre molesto e potente servicio que desmantelaba completamente a recepción das nosas. Cando as de Andrés Martínez conseguían enviar o balón máis alá da rede as lucenses aproveitaban a contundencia do ataque das súas centrais e pechaban rápidamente os puntos. Tan só no terceiro xogo puido o Navales Chicolino achegarse un pouco no luminoso gracias a unha xeira extraordinaria en servicio de Paula Vázquez mais no foi suficiente para anotarse o parcial e premiar o bo traballo que se está a facer con este novísimo equipo. Trala súa derrota en Lugo as infantís pechan a clasificación da liga galega con 2 vitorias en 21 encontros. Polo Navales Chicolino: Lea G., Paula V., Lía V., Marta S., Irea T. e Laura O. Como reservas atopábanse Luciana V., Vera e Laura P.