Resultados do sábado 9 de abril:

ZALAETA "C" 1-3 PROBOIN BOIRO VOLEIBOL 

(25-23,17-25,21-25,19-25)-(Copa Galicia feminina)

As rapazas seguen adiante

Vitoria a domicilio do primeiro equipo feminino do Boiro Voleibol en terras coruñesas nun partido ó que as nosas viaxaban con numerosas e importantes baixas como as de Carolina Cuadros, Ángela Triñanes, Sara Martínez, Leonor Lorenzo ou Anael Gómez. Comezaban as nosas cun xogo errático no que non funcionaba o seu habitual forte K1. Os erros en recepción e ataque condenaban ás de Andrés Martínez ante o xoven equipo herculino no primeiro parcial no que a vitoria sería para as locais. A partir de aquí as boirenses non deron opción. Cunhas atinadas Rebeca González e María Triñanes o Proboin gañaría os tres seguintes sets para levarse a eliminatoria e seguir adiante nesta Copa Xunta de Galicia. Polo Proboin Boiro Voleibol xogaron: Luci Paz, Evelyn Urrutia, María Triñanes, Rebeca González, Ámgela Fernández, Alicia Novoa e Carla Castro (líbero). Como reserva atopábase Luisa Ferreirós. Na vindeira eliminatoria o Proboin medirase ó Comercial Durán pontevedrés.

REDESYL BOIRO VOLEIBOL 3-2 COMERCIAL DURÁN

(21-25,20-25,25-20,25-15,15-13)-(Copa Galicia masculina)

O Redesyl tapa feridas na Copa Galicia

Vitoria pola mínima dos rapaces que dirixe Antón Pérez nun partido que se meteu no peto o conxunto que menos erros cometeu. Comezaba a disputa cos boirenses desconcertados, cunha recepción deficiente e cunha intensidade bastante reducida. As dificultades na construcción pasaban factura ós nosos e impedíalles crear xogo con fluidez. Esta situación traducíase en vitoria pontevedresa nos dous primeiros parciais e deixando ó Redesyl contra as cordas. Chegados a este punto, os boirenses engrasaron a maquinaria, sacudíronse a presión e xogaron sen trabas o resto do encontro. A reducción de erros non forzados por parte dos de Boiro puxeron en apretos ó Comercial Durán que xa non podía subsistir a base de irregularidades alleas. Da man dun atinado Xavier Sarille a remontada foi posible e a vitoria volveu a terras barbanzanas tras unha boa xeira de derrotas. Agardamos este sexa o cambio de dinámica que se estaba agardando de este equipo, xa que a calidade é infinitamente maior á mostrada na competición regular. Polo Redesyl Boiro Voleibol xogaron: Rubén Taibo "Mechas", Alén García, Adrián Armental "Nara", Juan "Mande", Antón Pérez, Juan Resúa e Juan Lorenzo (líbero). Como reservas estaban Manuel Pérez "Cholo", Xavier Sarille, Roberto Rodríguez "Tito", Luis Lustres e Fran López. Tras superar esta ronda o equipo filial masculino medirase na próxima eliminatoria ante o CV Rianxo da 1ª división nacional no polideportivo de "A Cachada". Moita sorte para eles.